BH
Cép Oma keur didata di kantor désa. Ngaran lengkepna mah Rohmana Bhaskara. Ari ku petugas ti désa ditulisna téh Rohmana Baskara.
Cép Oma: “Punten, Bu, aya nu lepat.”
Petugas: “Muhun, punten lepat naonna?”
Cép Oma: “Euh… Bhaskara, euh kedahna nganggo BH.”
Petugas: “Kumaha, kumaha?”
Cép Oma: “Teu nganggo BH, Bu. Kedahna nganggo…”
Petugas: “Muhun rusuh ti rorompok téh. Janten teu kabujeng nganggo BH. Naha encép terang?”
Cép Oma olohok.
Imat Rohmat Suci
Karangpawitan, Garut
Indit Reuni
Acéng keur tatahar nyiapkeun kaperluan Reuni 212. Awi jeung bandérana, sorban, jubah, jeung bebekelan. Disampeurkeun ku Munir.
Munir: “Rék ka mana manéh?”
Acéng: “Rék indit ka Jakarta.”
Munir: “Deuk naon?”
Acéng: “Deuk reuni di Monas. Ramé aya jutaan jelema.”
Munir: “Oh, ari kitu mah kuring gé deuk milu.”
Munir indit. Nyiapkeun itu-ieuna. Tuluy datang deui nyampeurkeun Acéng bari mawa babanda saloba-loba.
Acéng: “Silaing mah dasar pidunya, naon éta mawa tanggungan cuanki. Jeung éta deuih, cuanki perjuangan haregana, ambuing… samangkok 25 rébu. Ngamangpaatkeun téh kabina-bina.”
Iman Jatining Kalbu
Cipanas, Cianjur
Sértipikat
“Kawin ayeuna mah kudu boga sertipikat heula”
“Euleuh”
“Kudu miluan heula kursus calon pangantén cenah”
“Sabaraha bulan?”
“Tanyakeun ka KUA atuh”
“Meni lieurnya ngabandunganana gé?”
“Heueuh”
“Mun teu boga sertipikat moal bisa kawin atuhnya?
“Sigana. Naha ku naon kitu?
“Bedo sigana mah kawin ka Nyi Sukma anak bandar sukro téh”
“Urang néangan nu ngayakeun nikah massal wé méh haratis”
“Moal maké sértipikat”
“Tanyakeun wé ka Embi maké atawa henteuna mah”
“Har?
Bobi – Bandung
Raja Léla
“Uing bingung ku kecap dina basa Indonesia”
“Kecap nu mana?”
“Éta geuningan”
“Nu mana?”
“Si Raja Léla”
“Béas Raja Léla terus korupsi Raja Léla terus nu lianna gé Raja Lela deuih. Na euweuh raja ti kaom lalaki?”
“Ilaing ngarti jeung diajar tata basa teu?”
“Genep taun diajarna ge nepi ka muruluk buuk”
“Ngarti meureun?”
“Henteu”
“Nu mana?
“Enya kecap nu tadi”
“Kuduna kumaha kitu?”
“Pantesna nu jadi raja mah lalaki lain awéwé kayaning Raja Jimbun, Raja Gembul, Raja Catur”
“Dasar teu nyakola ilaing mah. Éta mah istilah atuh!”
“Ari uing nyebut naon kitu?”
“Teuing”
Bobi – Bandung
Cross
Lanceuk : “Pèk sia, sadul! Kapanggih! Bèjakeun ka si Bapa!”
Adul: “Apah ari Abang? Kapanggih apa?”
Lanceuk : Jir.. “abang”.. Biasana gè “aa” satèh.
“Uing nempoan Instagram manèh. Nanaonan ari ilaing, lalaki lalaki dangdan makè gamis jeung kerudung? Ngaran jadi Adele sagala rupa!”
Adul: “iyah atuh bang. Ngarah piral. Kapan sekarang lagi usum cross hijaber, bang”
Lanceuk: “Euh… matak ulinna ulah di kandang waè geura! Uteuk manèh meureun nya geus di cross jeung hayam?”
Teh Uli
Meteor Utara V Bandung
Aki I
Aki: “Aèh aèh… Kunaon ari eneng, balik balik ti sakola kalahkah ceurik?”
Eneng: “Tuh ku babaturan geura kii…”
Bapa: “Yap atuh ka dieu! Deudeuh teuing incu aki. Na dikumaha ku babaturan tèh?
Eneng: “Nya èta pèdah teu bisa-bisa ngajawab soal, disirikan otak udang ceunah, Ki…”
Aki: “Nya keun baè atuh Neng, da udang mah ngeunah bisa digoreng…”
Eneng: “Harr….!!”
Teh Uli
Meteor Utara V Bandung
Aki Ii
Aki: “Aèh aèh anaking… incu aki. Teu kamari teu ayeuna, ngan ceurik jeung ceurik baè balik sakola tèh! Kunaon deui atuh?”
Eneng: “Itu geura Ki, piraku eneng disebut goreng patut!”
Aki: “Oh, can pernah ngasaan aki mah!”
Eneng: “Naon, Ki?”
Aki: “Nyèta goreng tutut. Pernah ngasaan ge nu dikulub.”
Eneng: “Beu…”
Teh Uli
Meteor Utara V Bandung