Ku Annisa
Siswa kelas 12 bogoheun ka kuring. Tapi kuring mah teu bogoh. Euweuh rasa resep saeutik-eutik acan.
“Jawabanna kajeun teu ayeuna oge. Isuk ditunggu jawabanna!” ceuk manehna meni wanteran.
Mun hade mah harita keneh dijawab. Ku ngedalkeun kecap embung. Memang embung. Nolak. Ieu kajadian moal dicaritakeun ka ema sanajan remen nanyakeun geus boga kabogoh atawa acan. Ema kungsi ngawawadian sangkan ulah tampikan. Ari kuringna teu resep piraku kudu ditarima. Rek curhat we babaturan nu ngaranna Titi. Manehna beda ti babaturan anu sejen. Tara loba nyarita. Komo tepi ka ngabocorkeun rusiah kuring mah. Sarta rek menta bongbolongan kumaha pijawabeun kuring anu payus pikeun eta lalaki.
“Ku naon kitu make embung ka eta lalaki?” tanya manehna.
“Teu resep,” kuring embung ngajelaskeun leuwih pertela.
Titi ngartieun kuring embung balaka.
“Kieu we atuh. Maneh nyarita ka manehna, yen maneh moal bobogohan salagi keur nyuprih elmu mah,” manehna mere saran.
Ku kuring langsung dipikiran.
“Kumaha lamun maksa ngajak bobogohan?” tanya kuring.
“Ajaran we heula saran ti kuring,” ceuk manehna.
Isukna manehna nyampeurkeun kuring di deukeut pabukon. Kabeneran kuring rek ka pabukon nunda buku. Manehna nagih jawaban.
“Punten A! Abdina tos gaduh,” kalah kitu jawaban nu kakedal.
Manehna unggeuk.
“Oh, hampura! Sugan teh acan aya anu boga,” pokna bari ngaleos.
Aya rasa beurat dina dada anu ilang sapada harita. Bangbaluh nyingkah. Memang tadina mah rek nurut kana saran Titi. Ngan sok sieun manehna maksa ngajak bobogohan. Jadi we api-api geus boga kabogoh. Jawaban meunang mikir sapeupeuting. Jitu.
“Kumaha?” Titi tumanya basa rek balik sakola.
“Sukses!” kuring ngacungkeun jempol.
“Jawab nya! Ku naon kitu maneh embung ka eta lalaki? Terus saha kitu eta lalaki teh?” manehna kepo.
“Ceuk manehna mah siswa kelas 12 MIA-1. Teu kungsi apal saha ngaranna. Ngan awakna pendek busekel jeung buukna beulah tengah,” kuring nginget-nginget.
Titi siga anu keur ngabayangkeun eta dedegan lalaki.
“Cik atuh geser motor nu maneh! Ngahalangan motor aing rek kaluar!” kadenge aya anu nyarita ti tempat nunda kendaraan siswa.
Kuring jeung Titi ngalalieuk ka lebah datangna sora.
“Itu lalaki anu dimaksud ku maneh teh?” Titi ngira-ngira.
Mata kuring nyidik-nyidik lalaki anu rada anggang ti lebah kuring duaan nangtung.
“Enya,” walon kuring pondok.
“Motor butut dibabawa. Motor jadul!” ceuk lalaki anu tadi nyarekan.
Lalaki anu naksir kuring ngahirupan motor vespa anu geus butut. Sorana beberekbekan matak gandeng kana ceuli. Tambah teu resep katempona.
“Karunya ih! Ku naon teu ditarima wae?” Titi nyarita.
“Ari maneh hayang mah kop!” ceuk kuring bari seuri maur.
Gening Titi mah jiga-jiga nu resepeun ka manehna.
“Ari maneh eling teu? Mana sina beungeutna jiga Justin Bieber atawa Steven Wiliams,” kuring hemeng.
“Ulah kitu! Aya mah lalaki anu nyaaheun ka urang, kudu ditarima. Kuring mah moal tampikan bisi hese jodo!” manehna nepikeun alesan.
Dua poe ti harita Pa Acep talatah ka kuring.
“Titip salam ka Titi. Bapa menta nomer WA-na!” pokna matak reuwas.
Moal salah eta guru Kimia teh naksir Titi. Padahal geus boga pamajikan jeung anak malah sakeudeung deui rek boga incu.
“Maksadna?” kuring asa teu percaya kana omongan eta guru anu geus huisan.
Titi tembong bingungeun. Manehna kalah menta saran ka kuring.
“Ulah tampikan awewe mah! bisi hese meunang jodo!” ceuk kuring nirukeun omongan manehna basa eta anu ditujukeun ka kuring.***
Nu nulis siswa Kelas 12 MIA MA Pakunagara Gereba, Cipaku, Ciamis 46252
Katerangan:
Ieu seratan parantos medal di Mangle no. 2764.