Bi Oyoh ngarasa reuwas basa ngadenge aya anu pasea ti lebah imah tatanggana. Tara-tara ti sasari eta salaki jeung pamajikan teh ngadon pacental-cental omong. Malah dibarung ku sada anu mantingkeun piring kana ubin matak paur anu ngabandungan. Gancang we manehna muru ka hareup pikeun mastikeun naon anu sabenerna keur kajadian. Beuki lila eta sora anu keur perang rumah tangga teh beuki tetela. Dina wanci harita tatangga sabudeureun imahna keur areuweuh di imah. Wanci sakitu mah mareumeujeuhna saribuk ku pagawean masing-masing.
Najan paur-paur oge kapaksa Bi Oyoh nyampeurkeun tatanggana anu aya di kencaeun imahna. Rek ngawani-wani maneh ngeureunkeun anu keur pasea. Bisi matak cilaka ka tatanggana anu acan wae dipareng boga turunan. Meureun eta anu jadi marga lantaranna katambah ku omongan anu jadi kolot jeung mitohana. Kitu panyangka manehna. Dirina geus aya di buruan imah tatanggana. Nu pasea teu eureun. Panonna neuteup awewe anu keur nyarandekeun sirahna kana taktak lalaki anu nukangan manehna, katembong ti luareun kaca. Puguh we Bi Oyoh jadi heran.
“Jih, geningan,” gerentesna.
Sora anu pasea bari mantingkeun barang teh geningan tina lap top anu keur nayangkeun film tina You Tube. Sorana jadi leuwih tarik sabab make pangeras sora.
“Ih, hanas geus reuwas. Atuh aya ku aneh cenah nya ngadon lalajo film anu pasea. Cik atuh anu romantis,” gerentesna deui.
Leos manehna ninggalkeun buruana.
“Ku naon sura-seuri?” tanya tukang sapu nu rek ngaliwat.
“Kepo ah,” walonna bari ngajanggilek.
Een Sukaenah
Karangpawitan – Kawali
Ciamis 46253
Katerangan:
Seratan ieu kantos medal di Mangle no. 2759.