Pindah ka Karajaan
Hédi hageut hayang pindah ka karajaan nu keur jadi sabiwir hiji. Ku Yusuf dicarék lantaran bisi dicerek pulisi kawas raja jeung ratuna.
Yusuf: “Indit ka karajaan éta mah nyaho di bui siah,”
Hédi: “Moal da barina gé ngan sakeudeung.”
Yusuf: “Sakeudeung? Émang rék naon, rék wisata?”
Yusuf: “Lain, deuk néangan awéwé di kerajaan éta. Sugan wé béda, henteu ménta tanjakan hayang dangdutan.
Tito Subagio
Ciranjang, Cianjur
Raja Émok
Andri jeung Dani keur merhatikeun Bang Tigor nu leumpang dituturkeun ku badéga jeung débkoléktorna. Bang Tigor téh usahana kana bank nguriling, jadi palumpatan warga nu karerepet.
Andri: “Bang Tigor mah geus pantes jadi raja,”
Dani: “Bener, duit loba, anak buah geus bisa jadi pasukan kavaleri.”
Andri: “Lamun jadi téh kira-kira naon ngaran karajaanana?”
Dani: “Karajaan Fulus Ribawi,”
Andri: “Alus tah. Ari gelar keur rajana?”
Dani: “Raja Émok!”
Toni Subrata
Banjaran, Kab. Bandung
Républik Bobotoh
Tingpucunghulna karajaan jeung nagara-nagara hayalan. Déri jeung Béqi ngarasa jalma téh géhgéran. Atuh da patutur-tutur viralna téh.
Déri: “Méh leuwih ramé urang nyieun karajaan yu,”
Béqi: “Lah telat atuh. Kuring mah geus tilu taun jadi warga nagara republic anyar.”
Déri: “Républik nanahaon? Asa karék ngadéngé urang mah,”
Béqi: “Ka mana waé ari manéh? Sakitu unggal Persib maén téh ngélébét bandérana.”
Déri: “Maksudna?”
Béqi: “Lengkap kuring mah. Bandérana aya, pamingpinna aya, wargna loba, KTA boga, sok naon deui,”
Déri: “Heuh maksud téh republik naon?”
Béqi: “Republik Bobotoh.”
Iqbal Partakusumah
Singaparna, Tasikmalaya
Kaos Belang
Abo jeung Aba keur ulin di curug, di landeuh katempo aya dua mojang maké kaos nu sarua, belang siga kuda zebra. Tayohna Mira jeung Rani nu keur ditalaksir ku Abo jeung Aba.
Abo: “Ba, itu dua mojang kécéngan urang, nya. Tapi nu katempo tonggongna wungkul. Siga kembar bajuna gé sarua ning.”
Aba: “Cik… énté bisa ngabédakeun teu nu mana Mira nu mana Rani… da uing mah teu bisa, tuda buukna gé sarua tukung.”
Abo: “Lah… ngabédakeun waé piraku teu bisa. Mira mah nu kaosna bodas belang-belang hideung.”
Aba: “Ari Rani?”
Abo: “Nu kaosna hideung belang-belang bodas.”
Aba ngahuleng
Komsut – KBB
Pepegatan
Adang: “Pa RT, abdi mah hoyong pirak sareng pun bojo. Tos teu kiat tuda!”
Pa RT: “Ké ké, ulah luluasan. Na teu kiat kumaha?”
Adang: “Unggal wengi ngider waé ka diskotik, ka tempat judi!”
Pa RT: “Istri Pa Adang resep dugem? Sok judi?”
Adang: “Sanés, Pa RT. Tapi milarian abdi. Jantenna abdi isin ku réréncangan.”
Komsut – KBB
Singa Buligir
Pamajikan : “Kang urang lalajo sirkeus di alun alun !”
Salaki : “Ah marales !”
Pamajikan : “Pédah bejana aya awéwé tumpak singa buligir …. !”
Salaki : (mani giak) “Aéh asa geus heubeul teu ka kebon binatang nempo singa”. Hayu isukan urang lalajo !.
Sanggeus meuli karcis geuwat asup kana tempat sirkeus. Langgéor singa ka luar ti kandang di tumpakan ku awewe maké calana panjang.
Salaki : (kukulutus). “Manaaa …. nu buligir téh ?”. Teu berkah ieu mah !
Pamajikan : “Apan saur abdi ogé, singa buligir !”
(Edje Rusmana Bandung)