Ku Abah
Kajadian dina bulan Ramadhan 2010 moal bisa leungit tina ingetan adi kuring, Dani nu imahna di Lembang.
Kira-kira ba’da Ashar telpon ngirining:
“Halo. Assalamu’alaikum. Abdi Cicih istrina Mustofa ti Depok,” calon bésan Dani nelpon, kabeneran nu narima Atéh, pamajikan Dani.
“Eh, wa’alaikum salam. Mani reuwas. Kumaha damang?” daréhdéh.
“Alhamdulillah. Ieu abdi sareng kulawargi nuju aya di Bandung , bubar upacara peresmian toko busana Muslim anu tatanggi”
“Oh. Atuh sindang heula ka rorompok di Lembang nya, da tos caket atuh ti Bandung mah.”
“Muhun mangga. Ieu ogé tos gaduh rencana bade sindang ka dinya. Kinten-kinten tabuh limaan panginten nya”
“Muhun, mangga, diantos pisan, ulah henteu nya.”
Pamajikan Dani hayang ngabagéakeun calon bésan nu munggaran pisan rék nganjang ka imahna. Buru-buru balanja ka pasar Lembang, meuli bahan-bahan asakan, mani macem-macem, dua kérésék gedé pinuh.
Datang ka imah, bahan-bahan asakan gancang diguar, tuluy kabéh di masak, mani pak-pik-pek.
“Pa. Pangmasakkeun sangu nya, riweuh yeuh” ka Dani salakina.
“Enya. Gampang ieuh maké rice cooker mah” geuwat Dani ngisikan béas, sup kana rice cooker, dicaian, tuluy stékerna dicolokeun.
Kira-kira tabuh lima calon bésan ngurunyung daratang katut anak-anakna, diitung-itung aya tujuhan.
Untung asakan geus bérés. Pamajikan Dani gura-giru kacai mandi da luut-léét késang.
Sémah ditarima di kamar tamu, ngobrol jeung Dani ngalér-ngidul bari nungguan waktu maghrib.
Kaluar ti cai, pamajikan Dani sasalaman jeung sémah, tuluy bébérés nyadiakeun asakan dina méja makan.
Dug…dug…dug… Allohu Akbar…Allohu Akbar! Waktu maghrib.
“Badé sholat di masjid. Dupi masjid palih mana?” ceuk calon bésan ka Dani.
“Palih kulon. Hayu sareng atuh” jawab Dani
Breng kabéh ngabrul ka masjid, iwal pamajikan Dani nu bébérés kénéh di ruang makan.
Balik ti masjid, sémah dariuk deui di ruang tamu.
Kaciri pamajikan Dani ngagupayan Dani ti ruang makan.
Beungeutna katingali rada sepa.
“Pah. Ari papah teu tiasa diandelkeun…” beungeutna bareubeu siga nahan ceurik.
“Aya naon kitu?”
“Rice cooker na teu acan dicetrékeun…”***
Katerangan:
Buka Puasa Bareng Bésan karya Abah téh parantos medal di Manglé nomer 2784.