Kacapangan ku istilah kaméra jahat. Kaméra nu nyaru beungeut asli. Nu pétot gé henteu goréng teuing. Nu hideung jadi beresih. Nu demék bisa ngamancungan. Tapi keur kuring mah kaméra téh bisa leuwih jahat lian ti nipu beungeut. Nya, kaméra jahat bisa megatkeun tali asmara.
Tatali asih kuring jeung bébéndé téh mémang keur renggang. Alatanana mah susah baé deuk sapimikiran jeung kolotna dina perkara jatukrami. Tungtungna kabula-kabalé, nya patepung gé jadi anggang. Ngobrol gé sapereluna baé.
Hiji waktu mah kuring indit ka acara réuni. Sakalian baé hayang nyobaan kaméra da mangkukna meuli hapé anyar. Kutan téh hapé kuring pangalusna. Jadi wéh unggal fofotoan jeung sélfi téh marakéna hapé kuring.
Atuh ari geus maraké téa hayang dikiriman. Ngagawékeun saenyana mah. Komo bari jeung kudu milihan heula. Aya nu hayang dikirim fotona téh keur sorangan, aya deui nu hayang ngumpulkeun foto babarengan. Ngan lebah foto nu lobaan mah aya foto kuring, ti mimiti foto gaya biasa, nepi ka nu rarapet pipi. Tangtu lain rapet pipi jeung lalaki da kuring téh lain homo. Hahaha.
Baning ku lieur, kuring ngiriman foto téh teu ngimeutan kontakna. Nepi ka ngirim foto nu rapet pipi jeung popotongan téh ka kontak bébéndé.
“Naon maksudna ngintunan foto kitu?” kitu cenah dina chat WA bari ditungtungan ku emo beureum beunget!
“Astagfirullah, punten lepat ngintun…”
“Oh, kedahna, ngintun ka salingkuhan, kitu?” cenah bangun meunteugeug.
“Sanés, Yang! Éta mah réréncangan…”
“Ka réréncangan tos wanton kitu?!” bangun nu nyengor. Satuluyna ngabérébét ambek-ambekan, tuluy ditungtungan ku kalimat matih, “tos wé dugi ka ayeuna mah atosan. Abdi mah tos teu miharep deui ka anjeun!”
Tangtu ku kuring gé ditémbal. Tapi sigana langsung dinonaktifkeun WA teuing diblokir. Da angger wé ceklis hiji. Duh ieung… lila nglalakon téh putusna mah ku cara kieu.
Abdul Aziz
Limbangan, Garut