Ku Yosep
Kang Nana jeung Mba Sasa éstuning pasangan anu nurub cupu. Kang Nana kasép, rancagé, jeung handap asor. Mba Sasa salain geulis, ogé pinter jeung soméah. Najan Mba Sasa aslina mah urang Yogyakarta, tapi basa Sundana aya ku lemes jeung ngareunaheun kadanguna. Eta meureun pédah soméahna henteu matak éra sasaha. Mba Sasa mah apan, henteu jeung boss wungkul ngobrol akrab téh. Ka kuring ogé anu saukur OB atawa pakacar, ih geuning sok ngamimitian ubral-obrol misobat. Enya ogé kitu, kuring atawa karyawan séjénna, tara aya nu wani heureuy cunihin. Da puguh soméahna Mba Sasa mah lain keur heureuykeuneun.
Kang Nana téh programer games. Cenah mah gajihna ogé henteu kawas karyawan séjénna. Unggal games anu dijieunna payu, meunang bonus. Matak enya ogé kakara tilu taun ngagabung di kantor kuring, ka kantor téh maké Fortuner anu cenah hargana ogé lima ratus juta. Ari Mba Sasa jadi Kepala Bagian Keuangan.
Henteu aya anu henteu satuju basa katingali Kang Nana jeung Mba Sasa papacangan téh. Puguh atuh, salain kasép jeung geulis, henteu dipohokeun duanana ogé balageur. Mindeng Kang Nana neraktir batur sakantor. Malah ka kuring mah mindeng ngeupeulan. Paribasa, keur budak cenah, atawa keur modal usaha sampingan.
Anu mimiti jadi bahan carita, basa sasalad korona mimiti cul-cel. Ka kantor téh mimiti dikudukeun maké masker. Tah harita, aya béja Mba Sasa positif kakeunaan ku COVID-19. Atuh ibur sakantor. Komo basa aya télépon ka boss, cenah sakabéh karyawan teu meunang kaluar ti kantor. Enya, apan cenah Mba Sasa téh geus aya dua mingguna mimiti karasa gejala korona téh.
Teu lila enya waé datang rombongan anu maraké APD, baju anu siga astronot téa geuning. Sakabéh karyawan ditanya. “Kungsi henteu ngobrol, padeukeut atawa nyepengan barang anu kungsi dicepeng ku Mba Sasa,” kitu biasana pananya téh.
Kuring tangtu waé reuwas lantaran dina dua minggu téh kungsi dititah nyieun entéh manis haneut. Tapi anu matak reuwas mah sabada kanyahoan pancakaki cinta Mba Sasa jeung Kang Nana.
“Mba Sasa téh salain papacangan jeung Kang Nana, ogé boga pekabor, dua urang,” haréwos Ocid basa kuring keur di dapur.
“Naon pekabor téh?” pok téh teu ngarti.
“Pekabor, perebut kabogoh orang, alias selingkuhan.”
“Baruk?”
“Enyana ogé, apan anu keuna ku korona mah kudu jujur kungsi panggih jeung saha waé. Nya kasebut Pa Rahnya, dosén di tempat kuliahna baheula. Geus lila cenah ngaheureuyanana mah, ngan lima bulan ieu mimiti sok jalan-jalan bareng. Anu saurang deui, adina boss, da apan mindeng ka dieu.”
Kuring molohok. Teu nyangka puguh ogé. Anu bageur téh geuning kitu. Ah, boa jelema mah euweuh anu bageur sagemblengna. Atuh terusna Pa Rahnya sakulawarga, ogé batur saruanganana, mahasiswana, langsung dikarantina. Adina boss ogé kitu, sobat-sobatna anu kungsi panggih, kolotna, kabogohna, milu dikarantina. Lieurna, salain selingkuh jeung Mba Sasa, apan Pa Rahnya ogé selingkuh jeung mahasiswina. Ari éta mahasiswina apan geus tunangan jeung lanceuk tingkatna. Kabogoh adina boss, ogé katohyan selingkuh jeung batur sakantorna. Ari éta sakantor kabogoh adina boss, apan geus boga pamajikan. Ah, lieur nuturkeunana.
Geus tilu poé karantina di kantor téh. Tapi acan bisa baralik da puguh nungguan heula hasil tés anu cenah bisa saminggu leuwih. Kuring, dibaturan ku Ocid, tangtu waé jadi anu pangriweuhna. Enya, apan susuguh kadaharan dua puluh urang karyawan téh jadi tanggung jawab kuring. Ocid saenyana bagéan kurir, tapi lantaran nyobat jeung kuring, atuh salila karantina téh henteu jauh ti dapur. Karyawan séjén éta ogé réa anu marantuan.
“Aya deui béja anyar, cenah Kang Nana ogé boga pelakor, dua urang,” haréwos Ocid pasosoré.
“Pelakor alias selingkuhan?”
“Enya, perebut laki orang. Anu saurang mantanna baheula, batur kuliahna, tapi itu mah geus kulawargaan. Anu saurang deui budak SMU anu cenah keur diajar ngaprogram games ka Kang Nana. Salaki batur kuliah Kang Nana, ogé katohyan selingkuh jeung batur sakantorna. Ari éta batur sakantorna salaki selingkuhan Kang Nana, ogé ternyata selingkuh jeung bossna. Ari budak SMU….”
“Geus… geus ah. Lieur alahbatah sieun ku si korona.”
Katerangan:
Carlu Korona karya Yosep téh parantos medal di Manglé nomer 2783.