Sieun Digupayan
Banjir gedé. Kuring numpak parahu karét, geus aya Bu Ningsih, juragan Bang Émok. Tim SAR ngagupayan sakur nu caricing di imah, sangkan daék diévakuasi. Tapi ku anéhna téh taya hiji ogé nu daék turun.
Tim SAR: “Naha taya hiji ogé nu alim diévakuasi?”
Kuring: “Panginten engké ngantosan parahu nu sanés.”
Tim SAR: “Har, kapan parahu ieu gé lowong kénéh. Nembé kaeusian duaan.”
Bu Ningsih: “Atos wé sim kuring sareng Cép Yoga, hiji-hijina warga dieu nu teu nganjuk ka kuring.”
Tim SAR: “Maksadna?”
Bu Ningsih: “Sakur nu digupayan ku Akang téh, éta nu narambut artos. Kantenan wé alim saparahu sareng kuring da sieun ditagih.”
Yusuf Subrata
Balééndah, Kab. Bandung
Lain Émok
Ceu Darsih bangun atoh lemburna kabanjiran. Manéhna ngumpul di imah Ceu Ratna nu sok dipaké ‘berjangji’. Karumpul sakur nu ngaranjuk ka Bang Émok. Sapuk paromana kabéhanana halégar.
Ceu Darsih: “Tuh, tuh Ceu Mimin badé nagih.”
Ceu Ratna: “Keun wé da moal bisa émok.”
Ceu Darsih: “Enya, sina ngadagoan raat sigana téh.”
Satutas Ceu Mimin datang mah, sakumaha sasarina baé ngaluarkeun catetan.
Ceu Mimin: “Mangga ibu-ibu dinten ieu kedah setor.”
Ceu Darsih: “Moal setor pan henteu émok.”
Ceu Mimin: “Husus banjir mah wios teu kedah émok, sabari tatih gé tiasa.”
Yoséf Sumpena
Batujajar, Bandung Barat
Taun Baru
Ocid: “Taun baruan di mana?”
Idoy: “Laut atuh!”
Ocid: “Geuning teu panggih, pan urang sakulawarga oge ka luat taun baruan teh!”
Idoy: “Di laut mana?”
Ocid: “Pangandaran atuh.”
Idoy: “Pantesan atuh, da lautna beda.”
Ocid: “Ari kitu di laut mana maneh taun baruan teh?”
Idoy: “Di lautan kasedih jeung kasangsaraan, hayang taun baruan teu duit, jomblo, jaba nyeri huntu!”
Yadili Sumanta
UIN Bandung
Taun Baruan
Aon: “Geus dirarancang ti anggalna keneh, taun baruan teh hayang di laut, mawa tenda bari nyerangkeun kembang api dina malaman puncak taun baru.”
Eran: “Laksana atuh taun baruan di lautna?”
Aon: “Laksana taun baruan di lautna mah, ngan eta kanyaataan teu saendah jeung nu aya dina bayangan.”
Eran: “Ari kitu kumaha?”
Aon: “Apan hujan sapeupeuting, tenda saawak-awak jibrug. Niat ayang ningali kembang api teh kalah ngahodhod katirisan!”
Yadili Sumanta
UIN Bandung
Jadi Dokter
Cita-cita keur leutik teh hayang jadi dokter. Waktu rek asup kuliah ka paguron luhur negri jurusan kedokteran teu lulus wae geus sababaraha kali testing teh. Kolot ngabeberah, keun wae teu jadi dokter oge, da loba oge pagawean jeung profesi sejen nu sarua hade jeung mulia ti jadi dokter. Harita kuring ngomong sorangan;
“Enya, keun bae ah, mun teu jadi dokter, sugan wae kahareupna bisa gawe nu aya hubunganana jeung dokter,” cekeng teh harita.
“Laksana atuh gawe jeung nu aya hubungan jeung dokter teh?” ceuk sobat kuring.
“Laksana pisan. Awak ririwit kuring mah, unggal bulan teh pasti wae kudu ka dokter. Bener wae aya hubunganana jeung pagawean dokter, jadi pasienna.”
Utami – Garut
Matre
Si Onih keur ngobrol jeung lalaki gebétan anyar di café:
“Kang damel di mana?”
“Wiraswasta, mung gaduh 8 hotél di Jawa sareng di Bali “
“(wow, konglomerat yeuh)…Dupi bumi di mana?”
“Aya di 5 kota , mung sadidinten mah di Pondok Indah Bukit Golf Jakarta “
“(mantap!)…Wah tangtos ageung bumina nya?”
“Ah alit, mung 3000 m2. Luas tanah 5000 m2”
“(ya ampun!)…Mobilna seueur nya?”
“Pajero Sport, Galant, Lancer, Outlander, Frontier, Serena, Teana, Benz , BMW, Alphard”
“(Hébring!)…Tos gaduh garwa?”
“Bujangan, teu pajeng-pajeng, héh..héh…”
“(susuganan bisa jadi salaki aing yeuh)…Parantos haji?”
“Alhamdulillah haji 4 kali, umroh ampir unggal taun”
“(wah, sholéh yeuh)…Dupi hobby?”
“Mung hiji, resep ngawadul, komo kanu matré mah….”
Abah